السلام عليكم و رحمة الله و بركاتة
(( ردو السلام يا قمرات ))
ازيكو يا بنات ؟ يا رب تكونو كويسين
كل عام وانتم بخير بمناسبة شهر رمضان
انا النهاردة حبيت انقلكو شوية افكار نعملها فى شهر رمضان ان شاء الله
و فى حاجات هتلاقى نفسك اتعودتى عليها و تعمليها علطول بعد كدا ان شاء الله
الفكرة الاولى : 30يوم فى شهر رمضان تصدق عن 30 شخص متوفى
حتى لو بمبلغ جنية يوميا ....قريب او صديق او جار او .......
وبعد شهر رمضان اجعلها عادة تصدق شهريا عن اى
متوفى وكل شهر لشخص مختلف
اللهم ارزقنى من يذكرني بعد موتي
الفكرة التانية : نقى 30 شخص من قرايبك .. صحابك القدام او الجداد بس ناس مبتكلمهمش كتير و اتصل كل يوم بحد فيهم بنية صلة رحم و ادخال سرور على قلب مسلم
الفكرة التالتة : ممكن توزعى تمر او ازايز ماية او وجبات بسيطة على الناس ساعة المغرب فى المترو او فى الشارع للى اتاخر على ميعاد الفطار و اكسبى ثواب افطار صائم
الفكرة الرابعة : وانتى رايحة صلاة التراويح خدى معاكى ازازة ميه او عصير و كوبايات و وزعيهم على الناس اللى جنبك وممكن كمان تجيبى علبة بسكويت و توزعها على الاطفال اللى بيصلو هناك و تقوليلهم لو شفتكم كل يوم هنا هوزع عليكو حاجه حلوه انتى كده هتخليهم يتعلقو بالمسجد و يا سلام لو علمتهم الصلاة
الفكرة الخامسة : نحاول كل يوم نفرح شخص بكلمة او بإننا نساعده في حاجة بيعملها أو بإننا نقدر حاجة بيعملها حتي لو هو نفسه حاسس انها واجب عليه مش محتاج شكر عليها
و نمنع نفسنا عن كلمة هنقولها أو موقف نعمله هيضايق اللي قدامنا مهما كانت الظروف
الفكرة السادسة : ساعات كتير بيتبقى اكل عندك ممكن تجمعيه فى علب بلاستيك ( العلب دى بيكون سعرها بسيط زى علب الكشرى كدة ممكن تشترى مجموعة منها و تخليها عندك لاى بواقى اكل ) و تحفظية عندك فى التلاجة او الفريزر و تديه وانتى نازلة لاى حد من عمال النضافة او اى حد محتاج
الفكرة السابعة : هاتى حلويات لابن حارس العمارة بتاعتك و انتى راجعة على البيت بجد هيفرح جدا و انتى لما تلاقيه فرحان هتفرحى
اللهم بلغنا رمضان و انت راض عنا
